BÛNGBI TÎ GÎGÎ MOBIMBA  NA NDÖ TÎ ÂYÂNGÂKÖDÖRÖ


Âbuäkodë tî Gîgî Mobimba abûngbi na Khanty-Mansiysk (Kanzaködörö tî Rusïi) tî tene tënë tî sêkôte tî âyângâködörö na ndö ti Gbândavungä ndâli tî Mayngö-ndo kwêzu sô alîngbi tî nînga (längö 5-8 tî Föndo 2017)

Bûngbi nî, sô adu na gbe tî UNESCO, Kündü tî UNESCO na Kanzaködörö tî Rusïi, Pialökua tëtî Vunga Sango na âzo kwê tî UNESCO (IFAP) sô ayeke na mabôko tî Kanzaköörö tî Rusïi, na Gövörömä tî Kûne Zukando tî Khanty-Mansiysk Okrug-Ugra, atisa âkpëngbä âwasêndâyê, âwandarämbëtî na âbuäkodë ngbangbo ôko töngasô na ndö tî gîgî mobimba. Âla löndö na âködörö 34 sô: ÂKödörö-Ôko tî Amerîka, Arazantîna, Belizîki, Benëen, Brezîli, Ênde, Ezîpta, Farânzi, Fïlïpîno, Ganäa, Hölânde, Iräan, Italïi, Kanzaködörö tî Rusïi, Kazakistaän, Ködörögbya-Ôko tî Angelëe, Ködörösêse tî Bêafrîka, Ködörösêse tî Dominîka, Ködörösêse tî Tyêki, Kolombïi, Lâtivia, Molodavïi, Nörövêzi, Palestîna, Sîni, Zaâmani, Zorozïa, Paragwee, Rumanïi, Sudäan, Sirïi, Uzbekistäan, Zambïi.

Âbuakodë nî abîngbi lö na ndö tî âkpëngbä tënë tî bätängö âyângâködörö tî ndögîgî mobimba kwê tîtene âyângâ sô âwatënëngö-nî awü pëpe sô ayîko pëpe. Sô UNESCO afa atene wüngö tî âyângâködörö ayeke 7000 na ndögîgî, me gï 70 laâ agbû ndo kwê, âtanga nî 6030 sô agbû ndo pëpe sï âwatënëngö nî töngana kôzo yângâ tî âla awü pëpe, töngana a bûngbi li tî âla kwê daä, ngbônga tî âzo tî sêse laâ ayeke tene nî. Ndâli nî, yângâ ôko ôko ayôo sêbibê na sêbängö-gîgî tî halëzo sô ayeke tene nî, sï agä mbênî mbâgë tî mosoro tî âzo tî sêse kwê. Nî laâ fôko â bata âyângâ kwê, mîngi nî âkêtê yângâ sô abema tî kûi.

Gbândatere ayeke ndo sô âyângâ kwê alîngbi tî gä daä, tî vula daä, tî vunga daä sî abata finî tî âla ndâli tî âwatënëngö-âla. Ngâ na mbâgë fôko âzo asâra kwê tî fa âyângâ tî ködörö na âmôlengê na dambëtî, atö ndânî na yângâ tî môlengê nî-mvenî sï asï na mbênî yângâ ndê na ndöbênî. Sô gbândatere ayeke edêe tî vunga hîngängö-yê na hïngângô-ndo ndê ndê na ndögîgî kwê, ayeke edêe ngâ tî mâi ködörö na kodë sô sï mayngö nî anînga, ngbanga tî sô ayeke zî lêgë na âzo tî gîgî kwê tî manda ndaräkua na kodëkua na terê tî âmbâ tî âla. Halëzo ôko ôko ahînga terê tî lo nzönî na hïngängö âmbâ tî lo, na kängbïngö âhîngängö-yê na âhïngängö-ndo na mbâ, na särängô-kua ôko mabôko na mabôko ndâli tî nzönî dutî na sîrîrî tî âzo kwê.

Marcel Diki-Kidiri

Featured Posts
Recent Posts
Archive
Search By Tags
Follow Us
  • Facebook Basic Square
  • Twitter Basic Square
  • Google+ Basic Square

ÂWASIMBÄ

ABÂA LÊNDO SÔ FÂNÎ

  • LinkedIn Social Icon
  • Facebook Social Icon
  • Twitter Social Icon
  • Google+ Social Icon
  • Instagram Social Icon
  • YouTube Social  Icon

© 2023 by  Sandra Booker. Proudly created with Wix.com